ནོར་བྲང་ཨོ་རྒྱན།
ནོར་བྲང་ཨོ་རྒྱན་ལགས་ནི ། ༡༩༣༣ལོར་གཞིས་རྩེ་གྲོང་ཁྱེར་གདོང་དཀར་གྲོང་ཚོའི་ཞིང་བའི་ཁྱིམ་ཚང་ཞིག་ཏུ་ སྐྱེས། ལོ་བདུན་གྱི་སྟེང་ནོར་བྲང་དུ་སྒེར་གྱི་བོད་ཡིག་སློབ་གྲྭ་འཛུགས་གཉེར་གནང་ བའི་སློབ་ཕྲུག་གྲས་སུ་བོད་ཡིག་དང་། བོད་ཀྱི་རྡེལ་རྩིས། བརྡ་དག་གི་དཔེ་ཆ་འཛིན་སྐྱོར ། ཧོར་ཡིག་སོགས་ལོ་བཅུའི་རིང་སྦྱངས་བརྩོན་གནང་། དཀའ་ཆེན་ངག་དབང་ལགས་དང་།དཀའ་ཆེན་བཟོད་པ་ལགས། དཀའ་ཆེན་པད་མ་ལགས་བཅས་མཁས་པའི་དབང་བོ་གསུམ་བསྟེན་ནས་ལོ་གསུམ་རིང་སུམ་རྟགས་དང་དག་ཡིག་ངག་སྒྲོན་སོགས་ལེགས་པར་སྦྱངས་པ་གནང་། ༡༩༦༠ལོ་ནས༡༩༦༨ལོ་བར་གཞིས་རྩེ་དམངས་སྲིད་མི་དོན་ཅུས་སུ་ལོ་བདུན་རིང་ཕྱག་ལས་གནང་། རྗེས་སུ་བོད་ལྗོངས་སྤྱི་ཚོགས་ཚན་རིག་ཁང་གསར་དུ་འཛུགས་གནང་གི་ཕྱག་ལས་བགྱི་ བར་གདན་འདྲེན་ཞུས་པ་ལྟར་ལྷ་སར་ལས་གནས་སྤར་ཏེ་ལོ་ལྔའི་རིང་བོད་ལྗོངས་ཞིབ་ འཇུག་བོད་ཡིག་རྩོམ་སྒྲིག་པའི་ཕྱག་ལས་གནང་། ༡༩༨༥ལོ་ནས༡༩༨༧ ལོའི་བར་བོད་ལྗོངས་སྤྱི་ཚོགས་ཚན་རིག་ཁང་དུ་བོད་ཡིག་དཔེ་རྙིང་དཔེ་སྐྲུན་གསར་ འཛུགས་གནང་བས་དབུ་འཛིན་གཞོན་པ་དང་། སྤྱི་ཁྱབ་རྩོམ་སྒྲིག་པ་གཞོན་པའི་མཚན་ཐོགས་ནས་ཕྱག་ལས་ལོ་གསུམ་རིང་ལ་གནང་། བོད་ཡིག་དཔེ་ཆའི་རྩོམ་ཞུས་ཀྱི་ཕྱག་ལས་གནང་ཞོར་མཁས་དབང་ཆབ་སྤེལ་ཚེ་བརྟན་ཕུན་ ཚོགས་ལགས་དང་མཉམ་དུ་བོད་ཀྱི་ལོ་རྒྱུས་རགས་རིམ་གཡུ་ཡི་ཕྲེང་བ་ཞེས་པའི་རྩོམ་བསྒྲིགས་སྒྲིག་རྩོམ་གྱི་ཕྱག་ལས་ལོ་ངོ་བཞིའི་རིང་གནང་། ད་ལྟ་བོད་ལྗོངས་སྤྱི་ཚོགས་ཚན་རིག་ཁང་ནས་གདན་ཞུ་གནང་བའི་ཞིབ་འཇུག་པ་ཆེན་ མོའི་གནས་བབ་ཐོག་མུ་མཐུད་དུ་ཁོང་རང་ཉིད་ཀྱི་གཞལ་དུ་མེད་པའི་རྣམ་དཔྱོད་དང་། དྲི་མ་མེད་པའི་ལྷག་བཅམ་བཅས་ལ་བརྟེན་ནས་བོད་མི་རིགས་ཀྱི་ཐུན་མོང་མ་ཡིན་པའི་ རིག་གནས་འཛིན་སྐྱོང་སྤེལ་གསུམ་ཐད་ཕྱག་རྗེས་བླ་ན་མེད་པ་འཇོག་གནང་མུས་མཆིས་སོ༎
བརྩམས་ཆོས་ལ།བོད་སིལ་བུའི་བྱུང་བ་བརྗོད་པ་ཤེལ་དཀར་ ཕྲེང་བ་ཞེས་པ་བོད་ལྗོངས་མི་དམངས་དཔེ་སྐྲུན་ཁང་ནས༡༩༩༡ལོར་དཔེ་སྐྲུན་བྱས། ཆོས་རྒྱལ་དྲི་མེད་ཀུན་ལྡན་གྱི་རྟོགས་བརྗོད་བསྔགས་འོས་བསྔགས་པའི་འགྲེལ་བ་པད་ དཀར་ཆུན་པོ་ཞེས་པ་བོད་ལྗོངས་མི་དམངས་དཔེ་སྐྲུན་ཁང་ནས༡༩༩༢ལོར་དཔེ་སྐྲུན་བྱས། བོད་ཀྱི་དེབ་ཐེར་དཔྱིད་རྒྱལ་མོའི་གླུ་དབྱངས་ཀྱི་འགྲེལ་བ་ཡིད་ཀྱི་དགའ་སྟོན་ ཞེས་པ་མི་རིགས་དཔེ་སྐྲུན་ཁང་ནས༡༩༩༣ལོར་དཔེ་སྐྲུན་བྱས ། རྗེ་ཙོང་ཁ་པ་ཆེན་པོའི་སྙན་ངག་གསུང་རྩོམ་བཤེས་གཉེན་སྦ་བ་ལ་གདམས་པ་ཨའི་དབྱངས་ ངེས་དང་། སྤྱན་སྔ་གྲགས་པ་བྱང་ཆུབ་དཔལ་བཟང་པོའི་རྟོགས་བརྗོད་སྙན་དངགས་བྱིན་རླབས་ཀྱི་ལྷུན་པོ། ཆོས་ཀྱི་རྗེ་གྲགས་པ་བཟང་པོའི་བསྟོད་པ་བཅས་ཁག་གསུམ་གྱི་འགྲེལ་བ་ཞེས་པ་མི་ རིགས་དཔེ་སྐྲུན་ཁང་གིས༡༩༧༧ལོར་པར་སྐྲུན་བྱས།
རྙིང་མ་བ་དང་། བཀའ་བརྒྱུད་པ། ས་སྐྱ་བ། དགེ་ལུགས་པ་བཅས་གྲུབ་མཐའ་ཆེན་པོ་བཞིའི་ཞལ་འདོན་ཕྱོགས་བསྒྲིགས་ཞེས་པ་བོད་ ལྗོངས་མི་དམངས་དཔེ་སྐྲུན་ཁང་ནས༡༩༩༧ལོར་དཔེ་སྐྲུན་བྱས། ཀྲུང་གོའི་བོད་རིགས་པ་ཞིབ་འཇུག་ལྟེ་གནས་ནས་དཔེ་སྐྲུན་གནང་བ་བསྟན་འགྱུར་ནང་ བཞུགས་པ་སྙན་ངག་གི་བསྟན་བཅོས་སྤྲིན་གྱི་ཕོ་ཉའི་འགྲེལ་བ་ངོ་མཚར་དགའ་སྟོན་ ཞེས་བྱ་བ་དེབ་གཅིག ནོར་བྲང་ཨོ་རྒྱན་གྱི་གསུང་རྩོམ་ཕྱོགས་བཏུས་ཀྲུང་གོའི་བོད་རིག་པ་དཔེ་སྐྲུན་ ཁང་ནས་པར་དུ་བསྐྲུན ། མཁས་དབང་ཆབ་སྤེལ་ཚེ་བརྟན་ཕུན་ཚོགས་ལགས་ནང་མཉམ་དུ་རྩོམ་སྒྲིག་གནང་བ་བོད་ཀྱི་ ལོ་རྒྱུས་རགས་རིམ་གཡུ་ཡི་ཕྲེང་བ་ཞེས་པ་སྟོད་སྨད་བར་གསུམ་བོད་ལྗོངས་བོད་ཡིག་ དཔེ་རྙིང་དཔེ་སྐྲུན་ཁང་ནས༡༩༨༡ལོ་ནས༡༩༩༡ ལོའི་བར་རིམ་པར་དཔེ་སྐྲུན་བྱས། གངས་ཅན་རིག་བརྒྱའི་སྒོ་འབྱེད་ཆོས་ཀྱི་རྣམ་གྲངས་མཐོང་ཚད་ཀུན་ལས་བཏུས་པ་ངོ་ མཚར་འཕྲུལ་གྱི་ལྡེ་མིག་ཆེན་པོ་ཞེས་བྱ་བ་བཞུགས་སོ་ཞེས་པའི་སྟོད་སྨད་བར་གསུམ་ ཀྲུང་གོའི་བོད་རིག་པ་དཔེ་སྐྲུན་ཁང་གིས༢༠༠༨ལོར་པར་སྐྲུན་བྱས།
Leave a Reply