དགུ་འགྲུབ།

ཁམས་འབྲི་རུ་རྫོང་ཤག་ཆུ་གྲོང་བརྡལ་དུ་སྐྱེས། རང་ལོ༤༣ཡིན། དྲ་སྟེང་རྩོམ་པ་པོ། སྨྱུག་མིང་ལ་ “གངས་ལྗོངས་གཞོན་ནུ། ”

༢༠༡༢ལོའི་ཟླ་༡༠ཚེས ༤ཉིན། དགུ་འགྲུབ་ཀྱིས་ནག་ཆུ་རྫོང་མཁར་དུ་རང་ལུས་མེར་སྲེག་བཏང་སྟེ། “བོད་ལ་རང་དབང་དགོས། རྒྱལ་བ་བསྟན་འཛིན་རྒྱ་མཚོ་བོད་ལ་ཕེབས་འཇུག་དགོས། ང་ཚོ་གང་དུ་སོང་ཡང་རང་དབང་མི་འདུག”ཅེས་སྐད་འབོད་བྱས་ཏེ་རང་སྲོག་བློས་གཏོང་བྱས། སྐུ་ཕུང་ཉེན་རྟོག་པས་འཕྲོག་ཡོད་ཀྱང་རྗེས་སུ་ཁྱིམ་མི་ལ་སྤྲད་འདུག

༢༠༠༥ལོར་རྒྱ་གར་དུ་བཙན་བྱོལ་ལ་ཡོང་ནས་ཤེས་རབ་དགའ་ཚལ་སློབ་གླིང་དུ་ཞུགས། ༢༠༠༦ལོར་ཕྱིར་ཕ་ཡུལ་དུ་ལོག་པས་འཇུ་བཟུང་བྱས། ༢༠༠༨ལོར་གློད་བཀྲོལ་བཏང་འདུག ཁོང་གིས་རང་སྲེག་བྱས་རྗེས་ས་གནས་སྲིད་གཞུང་ནས་ཁོས་ཆང་རག་འཐུང་བའི་རྐྱེན་གྱིས་ཚེ་ལས་འདས་པར་འགྲེལ་བརྗོད་བྱས་ཏེ་ཕྱོགས་གཅིག་ནས་ཕྱི་ཕྱོགས་ལ་གསང་རྒྱ་བྱས་ཡོད་འདུག

དགུ་འགྲུབ་ཀྱིས་QQདྲ་གནས་ལ་རྩོམ་ཡིག་མང་པོ་སྤེལ་བའི་ཁྲོད་དུ་རྩོམ་ཡིག་གཉིས་ཁོང་གི་ཁ་ཆེམས་ཡི་གེ་ལྟ་བུར་སྤེལ་ཡོད་འདུག
“སྤུན་ཟླའི་བརྩེ་སེམས།
ཁ་བ་རི་བའི་ཕུ་ནུ་མིང་སྲིང་ཚོས་འདས་སོང་ལ་ཕྱི་མིག་ཅིག་བལྟས་ཚེ། ཕངས་སེམས་དང་ཁོང་ཁྲོ། སྐྱོ་གདུང་དང་མིག་ཆུ་ཞིག་ལས་དགའ་སྤྲོའི་རྣམ་པ་མ་མཐོང་ཡང། མདུན་ནས་བསུ་བའི་ཆུ་འབྲུག་གནམ་ལོ་གསར་ཚེས་འདིའི་ནང་ནས་ཁྱེད་རྣམས་སྐུ་ཁམས་བདེ་ཐང་དང་བྱ་བ་ལམ་འགྲོ་རེ་སྒུག་མངོན་འགྱུར་ཡོང་བའི་སྨོན་འདུན་ཡང་ཡང་ཞུ་བ་དང་ཆབས་ཅིག ཁྱེད་རྣམས་ཀྱིས་རང་རིགས་ཀྱི་སྤོབས་པ་གཟེངས་སུ་བསྟོད་དེ། རང་ཕྱོགས་སུ་ཕམ་ཁ་དང་གྱོང་གུད་ཅི་ཙམ་བྱུང་ཡང་བློ་སྟོབས་མ་ཉམས་པའི་སྒོ་ནས་ཆིག་སྒྲིལ་ལ་འབད་འབུངས་དམ་ཟབ་ཡོང་བའི་རེ་བ་ཤིན་ཏུ་ཆ། འབྲི་རུ་དགུ་འགྲུབ་ནས་ཞེས་འཁོད་ཡོད་འདུག”

(ཚེ་སྲོག་གི་རྡུང་བའི་རྒྱལ་རྔ )

“སྐྱིད་སྡུག་དང་ལས་དབང་གཅིག་པའི་གངས་ཅན་པའི་དམིགས་ཡུལ་ནི། རང་བཙན་གཙང་མའི་སྒོ་ནས་གོང་ས་མཆོག་བོད་དུ་གདན་འདྲེན་ཞུ་རྒྱུ་ནི་ང་ཚོའི་མངོན་འདོད་ཡིན། འོན་ཀྱང་གོང་ས་མཆོག་གིས་འཚེ་མེད་ཞི་བའི་སྒོ་ནས་དབུ་མའི་ལམ་གྱི་སྲིད་བྱུས་གཏན་ལ་ཕབ་སྟེ་རང་སྲིད་རང་སྐྱོང་གི་ཐོབ་ཐང་ལ་འབད་བརྩོན་གནང་བ་ལ། བོད་མི་ས་ཡ་དྲུག་གིས་ཁོང་གི་བཀའ་དགོངས་སྤྱི་བོར་བཀུར་ཏེ་ཡུན་རིང་རེ་སྒུག་བྱས་ཀྱང། རྒྱ་གཞུང་གིས་དེའི་ཕྱོགས་ལ་ཐུགས་ཁུར་དང་རྒྱབ་སྐྱོར་ཕུད། བོད་པའི་བདེ་སྡུག་གླེང་བ་ཙམ་གྱིས་འཛིན་བཟུང་དང་མནར་གཅོད་ཚད་ལས་རྒལ་བ་གཏོང་བས་མ་ཚད། གོང་ས་མཆོག་ལ་མཚན་སྨད་དང་བོད་འདི་ཀྲུང་གོའི་ཆ་ཤས་ཡིན་པའི་དམ་བཅའ་བརྟན་པོ་མེད་ཚེ། ལྐོག་གསོད་བཏང་སྟེ་གར་སོང་ཆ་མེད་དུ་འགྲོ་བ་ལས། བོད་མིའི་བདེ་སྡུག་ལ་དོ་སྣང་དང་དྲིལ་བསྒྲགས་ཅི་ཡང་མེད་སྟབས། ང་ཚོས་ཞི་བའི་འཐབ་རྩོད་ནི་རྣོ་ངར་ཆེ་རུ་བཏང་སྟེ། བོད་པའི་དངོས་ཡོད་ཀྱི་གནས་ཚུལ་རྣམས་དྲིལ་བསྒྲགས་དང་བདེན་དཔང་གི་ཆེད་དུ། རང་ལུས་མེ་རུ་མཆོད་དེ་བོད་རང་བཙན་གྱི་འབོད་སྒྲ་སྒྲོགས་དོན། ཀྱེ་ནམ་མཁའི་ལྷ་ཆེན་པོ་ཁྱེད་ཀྱི་སྤྱན་ཟུང་བོད་ལ་གཟིགས་དང་། མ་ཡུམ་གྱི་ས་ཆེན་པོ་ཁྱེད་ཀྱི་བྱམས་རྩེ་བོད་ལ་དགོངས་དང། བར་གནས་ཀྱི་འཛམ་གླིང་ཡོངས་ཀྱིས་དྲང་བདེན་ལ་མཐོང་ཆེན་གནང་རོགས། དྭངས་གཙང་ཁ་བའི་ལྗོངས་འདིར་དམར་པོ་ཁྲག་ལ་བསྒྱུར་བས་མ་ཚད། དྲག་པོ་དམག་གིས་ས་གཞི་བཀང་སྟེ་བར་མི་ཆད་པའི་དྲག་གནོན་རྒོད་ཀྱང། དཔའ་ངར་ཞུམ་པ་མེད་པའི་གངས་ཕྲུག་རྣམས་ཀྱིས་བློ་གྲོས་ཀྱི་གཞུ་མོ་བཀུག ཚེ་སྲོག་གི་མདའ་མོ་འཕང་སྟེ། དྲང་བདེན་གྱིས་གཡུལ་ངོ་ཟློག་རྒྱུ་ཡིན། མཇུག་ཏུ་ཁ་བ་རི་བའི་ཕུ་ནུ་མིང་སྲིང་ཚོས། འདྲ་མཉམ་དང་རང་དབང་གི་ཐོབ་ཐང་ལོངས་སུ་སྤྱོད་ཕྱིར། གངས་ཅན་པའི་སྤྱི་དོན་ལ་གཙོ་བོ་དང། སྒེར་དོན་ལ་ཕལ་པ་བྱས་ཏེ། རྡོག་རྩ་ཆིག་སྒྲིལ་གྱིས་མདུན་དུ་སྐྱོད་རྒྱུ་ནི་ངའི་རེ་བ་ཡིན། འབྲི་རུ་བ་དགུ་འགྲུབ་ནས། ཕྱི་ལོ་༢༠༡༢ལོའི་ཟླ ༣ཚེས་༡༤ཉིན། ”ཞེས་འཁོད་ཡོད་འདུག